“[…] Бурханд итгэж байвал, Бурханы Хүүд итгэж байвал, Ариун Гэгээнтэн Мэргэдэд итгэж байвал та аврагдаж, оршихуй тань үүрд үргэлжлүүлэн оршино. Хэдэн алдаа гаргасан байлаа ч гэмээ наманчилбал уучлагдаж магадгүй юм. Хэрэв та Бурханы Хүүтэй учирсан бол эсвэл ариун Гэгээнтэн Мэргэдийн нэгтэй учирч Тэднийг дагаж, энэ материаллаг оршихуйд байх хугацаандаа Бурханы хуулийг дагаж байвал та аврагдах болно.”
За, сайн байцгаана уу? Диваажингуудад хайрлагдсан Бурханы үр сад та нартайгаа бүгдтэй нь мэндчилье. Та нарыг санаа зовж байгаа байх гээд би хэдэн үг хэлье гэж бодлоо. Хэдхэн үг биш ч байж магадгүй. За тэгэхээр, та нар намайг сонсож буй болохоор би байж л байгаа гэсэн үг. Намайг хорлох гэсэн шулмын асуудлыг би зохицуулах хэрэгтэй хэвээр л байна. Хэдийгээр би ялах талдаа байгаа ч гэсэн нөлөө нь байсаар л байгаа. Саяхан ч гэсэн намайг өөр хаалга хэрэглэдэг болсон байхад хүртэл өнөөх шулмын шидээ хаалганы маань гадна хийчихсэн л байсан. Гэхдээ би дандаа тодорхой цагуудад хурдхан сэмхэн гардаг юм. Заримдаа сэм гарахаас арай илүү урт хугацаагаар гарна л даа. Би чанга охин тул надад битгий санаа зовоорой. Би чанга хүн шүү. Тийм ээ, дахиад л амьд гарна. Үгүй байлаа гэхэд угаасаа бид нар хэзээ нэг өдөр явж л таараа шүү дээ. Би үхвэл үхнэ л биз. За.
Гэхдээ мэдээж хэрэг би та нарын төлөө чадах чинээгээрээ амьд үлдэхийг хичээх болно. Та нарыг ямар нэг шулмын шид ашигладаггүйд баяртай байна. Ялангуяа хар шид. Яагаад гэвэл маш хүнд үйлийн үртэй учраас та нарт маш муу. Хэдий сувдаг чөтгөрүүдийн ертөнцөөс сурсан үйлийн үрийн завсар зайн арга хэрэглэж байвч шийтгэл хүртэх уршигтай. Яагаад гэвэл эрт орой хэзээ нэг цагт баригдана.
Би шулмаас ингэж асуулаа л даа: “Яагаад вэ? Чи яагаад чөтгөрүүдийг дагаа вэ?” гэхэд тэр, “Яагаад гэвэл тэд маш хүчирхэг, мэдрэгдэхүйц нөлөөтэй байдаг.” гэж хэлсэн. Би “Үгүй дээ, үгүй. Энэ нь зөвхөн бидний амьдардаг энэ биет орон зайд, энэ ертөнцийн зуурдын мөн чанарт л оршиж байгаа юм. Түүнээс гадна тэд хүн байж байгаад, чөтгөр шүглэснийг эс тооцвол үнэндээ чөтгөрүүд анхандаа бараг оргүй хоосноос бүтээгдсэн гэж хэлж болно. Учир нь тэднийг хүмүүсийн ‘муу үйлийн’ энерги бүтээсэн тул тэрхүү энерги нь сарних юм бол тэд нар замхран үгүй болох болно. Хэчнээн их хүчтэй байлаа ч тэд үгүй болно. Харин та Бурханд, Бурханы Хүүд, ариун Гэгээнтнүүд болон Мэргэдэд итгэдэг бол авралд багтан оршихуй тань үүрд үргэлжлэх болно. Хэдэн алдаа гаргасан байлаа ч наманчилбал өршөөгдөж болох юм. Хэрэв Бурханы Хүүтэй юм уу ариун Мэргэд, Гэгээнтнүүдтэй учирсан бол, хэрэв Тэднийг дагадаг бол, Бурханы Хуулиудыг энэ биет ертөнцөд байхдаа сахидаг бол та аврагдах болно.” гэж хэлсэн.
Диваажинд бүгдээрээ сайн санаатай тул тэнд бидэнд хууль гэж байхгүй. Тэдний зүрх сэтгэл ариун бөгөөд зөвхөн Бурханыг л шүтдэг. Тиймээс тэдэнд ямар ч асуудал, ямар ч муу энерги байхгүй. “Үгийн санд” нь муу үг огт байхгүй. Тэр бүү хэл тэдэнд үг хэлээр ярих ч шаардлага байхгүй. Нэгэндээ хэлэх гэсэн зүйлээ өндөр түвшний телепатаар дамжуулдаг. Зөвхөн энэ биет ертөнцөд л бид маш олон хэлийг хэрэглэх ёстой болдог юм. Тэгсэн ч гэсэн бид бие биеэ төдийлөн сайн ойлгодоггүй. Тэгээд маш олон буруу зүйл хийж, тэмцэлдэн, заримдаа бүр нэгнийгээ хороож, мөн өөрсдийнхөө муу заяанд төрсөн золгүй гэж боддог төрөлтнүүдээ хороодог. Бас мэдээж бид амьтан-хүмүүс, моддын аймгийн-хүмүүсийг ямар ч үнэ цэнгүй гэж боддог.
Бурханыг л дага. Бурханыг л шүт. Хэрэв танд өндөр түвшинд хүрсэн, гэгээрсэн Их Багш байгаа бол тэр зол завшаандаа баярлаарай. Энэ гараг дээрх ямар ч их наяд мөнгөтэй хүнээс илүү та баян гэсэн үг учраас талархах учиртай. Олон их наяд, олон зиллионтой хүмүүсийг өөртэй тань харьцуулшгүй. Бүхэл Ертөнцөд та шилдэг нь. Гэхдээ мэдээж хэрэг Их Багш нар, Гэгээнтнүүд, Мэргэд Бурханы Хүү, Оройн Дээд Бурханыг эс тооцвол шүү дээ.
Мэдээж хэрэг та нар надаас яагаад энэ шулмын шидийг зохицуулах хэрэгтэй хэвээр байгааг асууж таарна. Яагаад гэвэл миний хаалганы өмнө тавьсан хортой цэцгийн хэлхээг хэмхэлсний дараа намайг өөр өрөөнд нүүж орохоос өмнө тэд өөр төрлийн систем маягийн зүйл хийчихсэн. Миний хоол боловсруулах тогтолцоо, амтны мэдрэхүйн тогтолцоог алдагдуулж, юу ч амтлахгүй, хоолны дуршилгүй болгож, ходоодны зохицуулалтад хүндрэл учруулдаг өөр систем маягийн зүйл. Тэгээд үүнийг нь нураачихаар тэд өөр систем тохируулчихсан. Гэрт маань холбоос цэг бий. Тийм учраас тэд тэр цэгийг ашиглан, юм хийх боломжтой байдаг. Үгүй бол намайг даяан хийж байхад хэн ч орж ирж, юу ч хийж чадахгүй. Би Суприм Мастер Телевизийн ажлыг хийх хэрэгтэй хэвээр байгаа учраас интернэтээр дамжаад, ажлаар маань дамжаад бүх төрлийн үйлийн үр ирдэг. Яагаад гэвэл Суприм Мастер Телевиз дэлхийн хүмүүсийн төлөө дэлхийтэй ажилладаг. Тусгаарлагдах боломжгүй. Гэхдээ хамаагүй ээ.
Тэгээд л тэд элдэв янзын заваан юмс, хархны ялгадсан тойрог гэх мэт зүйлээр миний хаягдлыг хүртэл тойруулаад тавьчихсан байдаг. Учир нь би ариун цэврийн өрөө орох хэрэгтэй байдаг болохоор тэр нь миний хоол боловсруулах тогтолцоонд төвөг учруулна. Тэрийг нь нураагаад үгүй хийчихсэний дараа тэд хаалгаар гарангуут дотор гаднагүй намайг маш их уурлуулах өөр нэг системийг тавьчихсан байсан. Энэ л асуудал. Үүнээс өмнө, тэр хортой хэлхээнээс өмнө тэд өөр системүүдийг хийсэн. Би өөр зүйл хийгээд завгүй, сүнс маань, оюун ухаан маань энэ биет ертөнцөөс илүү өндөр түвшинд байсан болохоор анзаарах сөхөө байсангүй. Золоор энэ бүхэн ард хоцорлоо. Гэхдээ оршнолыг маань бүхэлд нь, бие махбод төдийгүй сэтгэл хөдлөл, сэтгэлзүй, оюун ухаан, түүнчлэн санхүүгийн тогтвортой байдлыг хямруулж чадахаар асар их нөлөөтэй байлаа.
Ямартай ч бид жаахныг (мөнгө) алдсан ч гэсэн энэ бол материаллаг зүйл төдий. Тэгтлээ их санаа зовох юм биш. Хэчнээн их хэмжээгээр бусдад өгсөн ч, миний оюун санааны хүч хангалттай байсаар л байвал, хангалтай байх л юм бол энэ дэлхийд тэсэж үлдэн ажлаа, бясалгалаа үргэлжлүүлсээр байх болно. Ажлаа үргэлжлүүлэхийн тулд би бас сүнслэг өндөр хүчний эх үүсвэр цэг, гарцуудыг үргэлж хайж шалгах хэрэгтэй болдог. Заримдаа бясалгал хийх цаг бага байсан ч гэсэн. Би хэдий хичээдэг ч заримдаа дэндүү их үйлийн үрээс болоод бие махбодыг минь дарлаж, намайг заримдаа бясалгах боломжгүй болгодог. Би аль байдгаараа хичээж байна.
Аз болж оюун санааны хүчний эх үүсвэр цэгүүд байдаг. Өөрийгөө залгаад дахин цэнэглэж байгаа мэт. Эрчмээ зогсолтгүй алдсаар, алдсаар байлаа ч гэсэн хэзээд өөрийгөө холбож цэнэглэж болно. Гэхдээ энэ цэнэглэгч гарцуудад өдөржин суугаад байж болохгүй. Үүнд ердөө хэдхэн секунд байхад л болдог. Яагаад гэвэл бие махбод тань үүнээс удвал тэсэхгүй. Хэдэн өдрийн дараа, заримдаа таван өдөр, заримдаа зургаан өдөр, заримдаа долоон өдрийн дараа энэ гарц хаагдчихдаг. Цаашид байхгүй болчихдог. Тиймээс би мэдэхийнхээ хэрээр өөр газраас хайж, мөн боломжтой бол байгаа газраа авчирдаг. Тэгээд өөрийгөө цэнэглэх боломжтой болно.
Маш өндөр түвшний сүнслэг гарцтай олон газар байдаг ч гэсэн би ашиглах боломжгүй. Тэглээ гээд яалтай ч билээ дээ? Байгаагаа л ашиглана. Бас тийм газруудын зарим нь нийгмийн хувьд маш үнэтэй газар байдаг. Зөвхөн зарим тусгай хүн тийш орж, тэнд амьдарч, эсвэл ажлаасаа хамаарч тэнд ажиллаж, эсвэл зүгээр л удам дамжуулж буюу тэнд байсан гэгээн хүмүүсээс өвлөн авсан байдаг. Тэглээ ч тэд эдгээрийн талаар юу ч мэддэггүй, ашиглаж ч чаддаггүй. Мэдлээ ч тэд ашиглаж чадахгүй учраас би энэ талаар хэн нэгэнд хэллээ ч гэсэн нэмэргүй.
Мөн одоо би та нартай ямар ч тэмдэглэлгүй, ямар ч унших дэлгэцгүйгээр ярьж байна. Тэгэхээр санаж байгаагаа л та нарт хэлье. Дандаа урсаад, жигдхэн, сэдвийнхээ дагуу тухайн зүйлийнхээ талаар үргэлжлээд байхгүй. Тэгсэн ч хамаагүй ээ, та нар бүгдийг нь ойлгоно. Ойлгохгүй бол ойлгохгүй л биз. Олон хүн ойлгодоггүй.
Ямартай ч та нар надаас яагаад тэр шулмыг устгахын тулд өөрт байгаа хүч чадлаа ашигладаггүй юм бэ гэж асуух байх. Уучлаарай. Би тэгж чадахгүй. Яагаад гэвэл хэрэв би хүчээ үүнийг зохицуулахад ашиглавал тэр эмэгтэй шууд үхнэ. Хэнийг ч хороохгүй байх нь миний байр суурь. Миний байр суурь, хандлага, зүрх сэтгэл, зорилго бол авран хамгаалах. Иймд би хэчнээн хэцүү байсан ч, хэтэрхий их шаналгаатай ямар ч нөхцөл байдал байлаа ч ногдсон хувь тавилангаа тэсвэрлэх л болдог. Бид энд устгах юм уу алах гэж байдаг юм биш. Бид энд хүмүүст аль болох аядуу зөөлнөөр тусалж, тэдний тэвчих хэмжээнд, ойлгох хэмжээнд оюун ухааных нь хүчийг, ухаж ойлгох хүчийг нь нээж өгөх юм бол тэд сэрж сэхээрч чадах юм. Мөн тэгж байж тэд үүнийг хүлээн зөвшөөрч, илүү өндөр түвшний мэдлэгийг, илүү их билиг ухааныг эрэлхийлнэ. Бид энд юм сүйтгэх гэж юм уу амь хөнөөх гэж байгаа юм биш. Аллага хэнд ч тус нэмэр болохгүй. Би маш их хайрыг л илгээдэг. Бид анагаахаас биш алах гээгүй. Би өдөр бүр Бурханд энэ олон жил хамгаалж ирсэнд нь талархдаг.
Намайг алах гэж оролдоод байгаа энэ эмэгтэйг хамгаалах гэж би Диваажингийн шүүхэд очсон. Би Бурханд, “Эрхэм ээ гуйя, Та Цаглашгүй Хүчтэн билээ. Өршөөгөөч гэж гуйя. Би түүнийг уучилж байна. Одоо ч уучилж өршөөсөөр байна. Учир нь тэр ердөө амь амьдрал гэдэг ухагдахууныг буруу ойлгожээ. Энэ хорвоогийн юм бүхэн хүмүүсийг уруу татан унагаах тийм их хүчтэй. Энэ биет оршихуйд хэн ч унаж, хэн ч алдаж болно. Тэгэхээр уучлаач гэж гуйя.” гэлээ. Учир нь тэд түүнийг эцэс төгсгөлгүй тамд тарчлаах гэж байсан юм.Аврал хаанаас ирэхийг ч мэдэхгүй, үүрд зогсолтгүй, өдөр шөнөгүй үргэлжилдэг гэж би урьд нь хэлж байсан даа.
Яагаад гэвэл тийм ч олон там үүн шиг байдаггүй. Эцэс төгсгөлгүй хэмээх энэ там шиг биш байдаг. Бусад тамууд нөхцөл байдлаас хамаарч, бүхий л аймшигтай, шаналалтай, төсөөлшгүй, харгис хэрцгий шийтгэлийг оногдуулдаг. Гэхдээ тэдний ихэнх нь амсхийж болохоор завсарлагатай байдаг бөгөөд эргээд шийтгэдэг гэсэн үг. Нүгэл нь хэр хүнд байснаас хамаарна. Харин завсарлагагүй там ийм байдаггүй. Энд мөнхөд шийтгэдэг. Мөнхөд аймшигтай өвдөлт мэдэрнэ. Аймшигтай, аймшигтай... Би яаж илэрхийлэхээ мэдэхгүй нь... Уй гашуу, өвдөлт шаналгаа бүгдээрээ хэзээ ч зогсохгүй үргэлжилсээр байна. Тэнд Будда заларч, таныг хооллолоо ч хоол аманд тань ороод халуун гал болон шатаад биеэр чинь доошилно. Эндэх хүмүүсийн хамгийн муу хоол хүнсийг ч тэнд идэж чадахгүй. Ийм тамд хэнийг ч унаасай гэж би хэзээ ч хүсэхгүй. Тиймээс л би тэр эмэгтэйд туслах гээд тэгж их хичээгээд байгаа юм. Тэр эмэгтэй өөрийнхөө нөхцөл байдлыг ойлгож, зөв, бурууг ялгаж ойлгон, өөрчлөгдөнө гэж найдаж байна.
Би “Хэн ч алдаа гаргаж болно. Энэ гаргийн тогтолцоо нь урхидах гэж хийгдсэн болохоор хэн ч алдаж болно.” гэж хэлсэн. Маш төвөгтэйгөөр маш их ярилцаж, маш их зөвшилцөж, би өөрийн зүгээс тодорхой хэмжээний төлөөс төлсний эцэст тэр эмэгтэй ойлгож, өөрийнхөө унах тамыг хараад наманчилж уйлсан. Тэр маш их айн дагжиж, чин сэтгэлээсээ наманчлан, дахин огт ингэхгүй гэдгээ амлалаа. Мөн өөрийг нь зүгээр л уучил. Тэгвэл хэзээ ч дахин хор хөнөөл тарихгүй гэсэн. Дахин хэзээ ч шид ашиглахгүй гэсэн. За, за. Санаа минь хэчнээн амрав аа.
Угаасаа би зөвхөн “За, эрхэм хүндэт Бурхан минь, эрхэм хүндэт бүх Диваажингийн шүүхийнхэн минь, гуйя, би түүний төлөө дэндүү ихийг гуйх учиргүй болохоор түүнийг өөрийнх нь зүтгэдэг тэр чөтгөрийн ертөнцөд нь ямартай ч тэдэнтэй нь үлдээнэ үү. Тэгвэл тэр магадгүй хүн чөтгөр байдлаараа байж болох юм. Би тэгж л гуйж болох юм гэж бодож байлаа. Харин сүүлд улам олон удаа, улам их хичээж, улам их төлөөс гаргасны эцэст түүнийг чөлөөлж чадлаа. Тэр чин сэтгэлээсээ наманчилсан учраас тэр. Гэхдээ дараа нь хэсэг хугацаанд хэдэн юм болсон. Тэр намайг улсад нь үлдэх нь гэж бодож л дээ. Энэ түүний санаанд нийцсэнгүй. Тэгээд чөтгөр түүнд дахиад л миний эсрэг тэг, ингэ гэж хэлсэн хэрэг. Би ч энд байсаар л байна. Санаа битгий зовоорой. Би жаахан өвдөлт, төвөг бэрхшээл туулах л болно. Гэхдээ төлөөс, ямар ч үнэ төлөх байсан хамаагүй. Санаа зоволтгүй. Ердөө битгий санаа зовоорой. Би тэсэж үлдэнэ.
